ព្រះមហាក្សត្រសម្តេចព្រះបរមនាថ នរោត្តម សីហមុនី បានចេញព្រះរាជក្រមនៅថ្ងៃទី ១១ ខែមិថុនា ប្រកាសដាក់ឲ្យប្រើប្រាស់ច្បាប់ស្ដីពី«សុវត្ថិភាពម្ហូបអាហារ»។
ច្បាប់ស្ដីពីសុវត្ថិភាពម្ហូបអាហារនេះ មាន១១ជំពូក និង៤៣មាត្រា។ ច្បាប់នេះកំណត់អំពីក្របខ័ណ្ឌ និងយន្តការសម្រាប់គ្រប់គ្រង និងធានាសុវត្ថិភាព គុណភាព អនាម័យ និងភាពស្របច្បាប់ នៃម្ហូបអាហារ ដើម្បីផ្ដល់កិច្ចការពារសុខភាព និងសុវត្ថិភាពម្ហូបអាហារសម្រាប់អ្នកប្រើប្រាស់ ព្រមទាំងធានាឲ្យមានការធ្វើពាណិជ្ជកម្មម្ហូបអាហារ ប្រកបដោយភាពស្មោះត្រង់។
ច្បាប់នេះ មានវិសាលភាពអនុវត្តចំពោះការគ្រប់គ្រងគុណភាពនិងសុវត្ថិភាពម្ហូបអាហារ ដោយគ្របដណ្តប់គ្រប់ដំណាក់កាល នៃខ្សែសង្វាក់ផលិតកម្មម្ហូបអាហារ និងលើអាជីវកម្មម្ហូបអាហារនានា នៅកម្ពុជា។
កាលពីថ្ងៃទី១១ ខែឧសភាកន្លងទៅ រដ្ឋសភា បានអនុម័តគាំទ្រទាំងស្រុងលើសេចក្ដីព្រាងច្បាប់ស្ដីពី «សុវត្ថិភាពម្ហូបអាហារ» នេះ ដើម្បីការពារសុខុមាលភាព និងអាយុជីវិតប្រជាពលរដ្ឋ។ ចំណែកគណៈរដ្ឋមន្ត្រីបានអនុម័តសេចក្ដីព្រាងច្បាប់នេះ កាលពីថ្ងៃទី១ ខែមេសា ឆ្នាំ២០២២។
 |
| ព្រះមហាក្សត្រ ព្រះករុណា ព្រះបាទ សម្ដេច នរោត្ដម សីហមុនី។ |
ប្រជាពលរដ្ឋព្រួយបារម្ភជាខ្លាំង អំពីអាហារដែលមានជាតិគីមី និងកំពុងដាក់លក់នៅតាមទីផ្សារ និងសំណូមពរឲ្យអាជ្ញាធរមានសមត្ថកិច្ច អនុវត្តវិធានការត្រួតពិនិត្យគុណភាពចំណីអាហារ ឲ្យមានប្រសិទ្ធភាព។ ប៉ុន្តែជាការឆ្លើយតបលោកនាយករដ្ឋមន្ត្រី ហ៊ុន សែន បានស្តីបន្ទោសពលរដ្ឋ ថាមិនចេះមើលខ្លួនឯង ចាំតែស្តីបន្ទោសដល់រដ្ឋាភិបាលទៅវិញ។ លោកហ៊ុន សែន សង្កត់ធ្ងន់ថា ពលរដ្ឋត្រូវនាំគ្នាធ្វើពហិកាឈប់ទិញបន្លែសាច់ដាក់ជាតិគីមីទៅ គឺវាចប់ហើយ។
មន្ត្រីជំនាញការពារអ្នកប្រើប្រាស់ និងបង្ក្រាបផលិតផលក្លែងក្លាយនៃក្រសួងពាណិជ្ជកម្ម រកឃើញផលិតផលទំនិញខូចគុណភាព ហួសកាលបរិច្ឆេទប្រើប្រាស់ និងទំនិញដែលប្រើជាតិគីមីខ្ពស់ ឬទំនិញដែលមិនអនុលោមទៅនឹងបទដ្ឋានបច្ចេកទេស រាប់រយតោន ក្នុងមួយឆ្នាំៗ រួមមាន គ្រឿងសមុទ្ទ ផលិតផលក្រៀម បន្លែ ផ្លែឈើ ថ្នាំពេទ្យជាដើម៕